Kad se je pročulo da je poša u škole za plovana, jena starija Tinjanka da je rekla:
- Benj, i ta će biti pop kad i ja kraljica!
To je došlo u uši Juretu Dobrili i da je on dobro zapošta.
Kad je učinija mladu mašu da je ša nać onu žensku ka mu je zaganala da neće nikada biti plovan.
- Teta Kate, ja san se učinija plovan. A vi, ste vancala kraljica? - da je reka.
Brižna ženska je ustala presuđena i prez besida. A biškup da je reka:
- Moja teta Kate, mladega ni ča suditi kako ni mrtvega buditi!
Jedanput da je biškupu Dobrili u Poreč došla jena grupa tinjanskih seljaki, da mu se potuže kako teško živu, kako njin dica i starci umiru od gladi.
- Presvitli - da su mu rekli i pitali ga - ma rečite nan, će doć kada bolje življenje za naš istrijanski narod?
- Će, sinci moji, će. Vero će, kad sami ljudi budu imali vlast u svojih rukah, kad budu svoji gospodari.
Ljudi da su se pogledali mriž sobon, pak da je jedan od njih reka biškupu:
- Presvitli, ma vas, da skužate, oni put zubi neće boliti!
- Neće sinko, ne, znan, ma tvoga unuka će, sigurno!
Jedanput je biškupu Dobrili u Poreč došla grupa seljaka z južne Istre, tamo vranića od nikuda - Juršići eli Sv. Kirina. Došli su se potužiti na zviljeno ponašanje mladega plovana.
Donka, biškup da hi je lipo sija zuz sebe i počeja poslušati ča mu imaju reći ti šeriji ljudi, pak kad su mu oni sve rekli, da je on reka:
- Ja ljudi moji, ča da van rečen?! Ja san mu sveti red da, ma mu nisan uza ordenje.
***************
